使用說明中心

每日工作

睇今日有咩預約

1. 打開 日曆，預設就係今日。
2. 每位美容師一行，一眼睇到邊個幾點做邊隻毛孩。
3. 預約卡右下角寫住 已付 / 未付；右上角係當日營業額同單數。
4. 撳上面 日 / 週 / 月 / 議程 切換睇法；撳美容師名可以只睇佢。

新增預約（電話 / WhatsApp 客）

1. 喺日曆撳一個 空格 — 嗰個時間同嗰位美容師會自動帶入。
2. 搵返客人（名或電話），或者撳 ＋ 新客人。
3. 揀毛孩同服務，價錢會按毛孩體重、品種自動計。
4. 撳確認。

如果揀嘅時間同美容師已經有預約，系統會提你，唔會俾你撞期。

有客行入嚟（即場到店）

1. 撳日曆右下角綠色 ＋ 即場。
2. 搵返客人，或者 新增客人。
3. 撳 登記 & 立即開始美容，預約會直接變成「美容中」。

即場到店唔使收訂金。

改時間、改美容師

1. 撳個預約打開 預約詳情。
2. 直接撳 時段 揀新時間，或者撳 負責員工 換人，即刻儲存。
3. 已經有預約嘅美容師會標示「已有預約」，揀唔到。

到店 → 美容中 → 完成

預約詳情頂部有一條進度：到店 → 美容中 → 完成 → 報告。每一步撳一下就轉。完成後可以影前後對比相，一撳經 WhatsApp 傳俾主人。

收款

1. 預約詳情撳 收款。
2. 揀付款方式（現金、轉數快、信用卡、儲值等），可以分幾種方式付。
3. 確認後預約會顯示「已付」。

客人有儲值，會自動顯示餘額，可以直接扣。

客人冇嚟（No Show）

預約詳情撳 標記未到店。記錄會留喺客人資料度，下次佢預約你會見到。

搵客人資料

去 客戶，打名、電話或毛孩名搜尋。入面有毛孩資料、過敏備註、儲值、積分同全部過往預約。

第一次設定

3 分鐘設定服務同價錢（設定模板）

1. 去 服務，撳 🧩 套用設定模板。
2. 揀一個最似你間舖嘅收費方式：簡單（一價）、標準（5 級體型 · 分短長毛）、精細（7 級體型 · 特殊品種）、貓專門，或者 白紙 自己由零開始。
3. 體型分級同特殊品種會自動設定好，你只需要改數字。

之後喺 服務 隨時可以加減服務、改價錢。個別熟客可以喺佢隻毛孩度設專屬價。

營業時間、假期

去 設定 → 營業時間，設定每日開關時間、每日名額同假期。網上預約只會開放營業時間內嘅時段。

美容師同排班

喺 員工 新增美容師；喺 排班 設定每人返邊日、幾點到幾點。客人網上預約時，只會見到有返工又得閒嘅美容師。

生成價目表

1. 去 服務，撳 預覽及生成價目表。
2. 揀配色（玫瑰、簡約、暗黑、薄荷等）同顯示狗狗 / 貓貓。
3. 撳 PNG 或 JPEG 下載，或者直接 列印。

改咗價錢，再生成一次就得。

分享預約連結同 QR Code

1. 撳頂部嘅 🔗 連結 按鈕，打開「分享你的預約連結」。
2. 可以複製連結放上 Instagram、Google 商家、WhatsApp 狀態。
3. 或者下載 QR 海報，印出嚟貼喺舖頭。

WhatsApp 預約確認（專業版起）

客人網上預約後，系統會用你間舖自己嘅 WhatsApp 號碼發確認。

1. 先喺 設定 → 通訊 連接你嘅 WhatsApp。
2. 去 Meta WhatsApp Manager 建立一個 Utility（公用事業） 範本，名叫 booking_confirmation，語言 Chinese (HKG)。範本內容喺設定頁有得一鍵複製。
3. Meta 批核後（通常幾分鐘），返嚟剔 WhatsApp 預約確認，填範本名，儲存。

只有客人自己網上落嘅單會發確認；你喺後台入嘅預約同即場到店唔會發。

認領目錄上已有嘅店舖

如果你間舖已經喺 PettoBook 美容店目錄度，喺店舖頁撳 認領此店，上載商業登記證（圖片或 PDF）。我哋核對店名同地址後會批准，並電郵通知你登入方法；店舖資料會自動連到你嘅帳戶。

出咗問題點算

客人收唔到 WhatsApp 預約確認

逐項檢查：

1. 設定 → 通訊：WhatsApp 已連接，而且 WhatsApp 預約確認 已剔。
2. 範本名要同 Meta 入面 一模一樣，而且狀態係「已批核」。
3. 客人資料有冇正確手機號碼。
4. 只有 客人網上自己落嘅單 會發；後台入、即場到店、過咗期嘅預約都唔會發。
5. 需要店主批核嘅預約，要批核咗先會發。

全部都啱都收唔到，請聯絡我哋，我哋可以睇到每一次發送嘅結果同原因。

WhatsApp AI 自動回覆開咗又自己熄咗

舊版本喺 設定 → 通訊 儲存其他設定時，會將 AI 開關還原。呢個問題已經修正。

• 網頁版：重新整理一次頁面。
• iPhone / iPad App：喺 訊息 右上角可以直接開關 AI，顯示「開」即代表已經儲存。

撳咗空格，時間冇帶入 / 要再揀一次

iPhone / iPad 店主 App 舊版本揀服務時會清走時間，新版已經修正：撳空格嘅時間同美容師會一直保留。請更新 App；網頁版重新整理一次即可。

客人話揀唔到時間

通常係以下其中一樣：

• 營業時間：嗰日冇開，或者設咗假期。
• 排班：嗰日冇美容師返工。
• 每日名額：已經滿咗。
• 服務時長：服務要 2 小時，但剩返嘅空檔唔夠長。

用你自己個電話打開預約連結試一次，就知客人見到咩。

揀美容師時顯示「已有預約」

代表嗰位美容師喺嗰段時間已經有另一個預約，系統唔俾撞期。可以先改時間，或者揀另一位美容師。

價錢計錯

價錢係按 毛孩嘅體重同品種 計。打開客人 → 毛孩，檢查體重、品種啱唔啱；改咗之後新預約會用新價錢。個別毛孩要特別價，可以喺毛孩資料設專屬價。

資料冇更新 / 撳咗儲存但好似冇變

1. 先確認網絡正常。
2. 網頁版重新整理；App 完全關閉再打開。
3. 收款前：如果預約仍然顯示「未付」，先打開 收款紀錄 睇吓係咪其實已經收咗，避免重複收款。

被登出咗

重新登入就得，所有資料都喺雲端，唔會唔見。如果經常被登出，請確認手機日期時間係自動設定，並聯絡我哋。

預約要求簽高齡同意書

10 歲或以上嘅毛孩會要求簽高齡同意書。如果隻毛孩其實冇咁大，打開毛孩資料檢查 生日；冇填生日嘅毛孩唔會被當成高齡。

方案與帳單

邊個方案有咩功能

• 免費版：開店、上目錄、日曆、客戶管理、價目表、QR 海報。
• 基本版：加 24 小時網上預約、自動通知。
• 專業版：加 WhatsApp 預約確認、儲值、套票、電子積分卡。
• 旗艦版：加會員積分、品牌專屬 App、移除 PettoBook 標誌。

WhatsApp AI 自動回覆唔包喺任何方案：需要另外付費開通第三方 Chatwoot 或 WATI 帳戶，再喺 設定 → 通訊 連接。

最新價錢同升級：設定 → 方案。

常見問題

資料安全嗎？

所有資料加密傳送，每間店嘅資料互相隔離（Row-Level Security），其他店無法睇到你嘅客人資料。

可以喺手機、iPad 用嗎？

可以。瀏覽器打開 pettobook.com 登入即用，亦可以加到主畫面。

想睇成個系統介紹

睇 功能介紹，有短片同客人預約流程示範。